Синоќа во Саудиска Арабија се одржа боксерски спектакл во тешка категорија во кој настапија неколку поранешни и актуелни светски шампиони. Ентонио Џошуа го победи Ото Валин, додека Џозеф Паркер го шокираше Деонтеј Вајлдер.
Во главниот меч на вечерта во Ријад, Џошуа доминираше против Валин. Тимот на Швеѓанецот реши да ја прекине борбата по петтата рунда. Британецот сега е во серија од три победи по ред откако претходно два пати беше совладан од Олександер Усик и има скор од 27 победи и три порази во кариерата. Следен ривал на Џошуа веројатно ќе биде Хрватот Филип Хрговиќ.
Вајлдер требаше да го победи Паркер за да обезбеди пресметка со Џошуа во 2024 година, но тоа не се случи. Американецот заслужено загуби од боксерот од Нов Зеланд со едногласна одлука на судиите. Вајлдер го запиша третиот пораз на последните четири борби во кариерата, откако претходно два пати загуби од Тајсон Фјури, а единствено го победи Роберт Хелениус. Сега е на 43 победи, три порази и едно реми во кариерата.
