Израел планира да одвои околу 350 милијарди шекели, односно 110 милијарди долари, во одбранбениот сектор во следната деценија, со цел да ја зајакне домашната индустрија за вооружување и да ја намали зависноста од странски добавувачи. Ова го изјави израелскиот премиер Бенјамин Нетанјаху на церемонија по повод дипломирањето на новообучени пилоти на воздухопловните сили.
Нетанјаху истакна дека новата програма има за цел да обезбеди стратешка автономија во производството на оружје, особено во услови кога дел од сојузниците, меѓу кои и Германија и САД, воведоа ограничувања за извоз на оружје кон Израел поради војната во Газа.
Според него, овие ограничувања ја нагласуваат потребата Израел самостојно да ги развива своите одбранбени капацитети. Во исто време, земјата продолжува да биде значаен извозник на оружје, особено за европските земји.
Минатата недела Германија и Израел потпишаа договор за проширување на ракетниот одбранбен систем „Стрела 3“, чија вкупна вредност изнесува околу 5,7 милијарди евра, што претставува најголем договор за оружје во историјата на Израел.
Т.Д.