Македонската филхармонија одржа генерална проба пред вечерашниот концерт, со кој што ќе прослави 81 години постоење. Концертот е подарок од филхармоничарите за публиката, вели еден од концерт- мајсторите на оркестарот.
- Се слави 81 роденден што означува една полна младост и зрелост за една Филхармонија. Ние секако прекрасно се чувствуваме секогаш, бидејќи на публиката и даваме подарок за нашиот роденден. А, нивниот подарок е аплаузот, кој што ќе ни го дадат, рече Владимир Костов, концерт- мајстор на Македонската филхармонија.
Како солист ќе настапи светски истакнатиот ерменскиот виолинист, Сергеј Хачатриан, кој е најмладиот добитник на првата награда на виолинскиот натпревар „ Јан Сибелиус“ во 2000 година. Тој ќе учествува во изведбата на „Концертот за виолина и оркестар“ од неговиот сонародник, композиторот Арам Хачатуријан , кој во советската ера важел за еден од водечките композитори.
- Голема одговорност е, но исто така е голема радост за мене да ја преставам во Македонија, во Скопје, музиката од мојата земја. Затоа што музиката на Хачатриан е многу поврзана со ерменскиот фолклор, исто така. Има многу мотиви од ерменската фолклорна музика, кажа Сергеј Хачатриан, виолинист .
На концертот со кој ќе диригира шеф – диригентот на Македонската филхармонија, Јерухам Шаровски, ќе бидат изведени и „ Свита бр.2“ од балетот „ Лабин и Дојрана“ од Трајко Прокопиев и „ Симфонија бр.1 во це- мол, опус 68. “ од Јоханес Брамс.
- Мислам дека е вистински репертоар за одбележување на толку важен ден , на така важен ансамбал. Тој е национално наследство. Македонската филхармонија се разбира, е најдобриот оркестар овде и еден од најдобрите на Балканот, вели маестро Јерухам Шаровски, шеф- диригент на Македонската филхармонија.
За нашата Филхармонија настапот во октомври во виенскиот Музикферајн беше успешно заокружување на првите 80 години постоење. А, 81 роденден е почеток на нова фаза во развојот и постигнувањата на единствениот симфониски оркестар кај нас.
Сотир Трајков