Албанскиот премиер Еди Рама во интервју за „Клан Косово“ упати критики до косовското раководство кое, како што рече, направило малку за поранешниот претседател Хашим Тачи и другите кои завршија пред судот во Хаг. Според Рама, Косово доброволно станало заложник на Србија, но нагласи дека мора да ги спроведе сите договори од Брисел.
Тој истакна дека обединување на Косово и Албанија е замисливо единствено во рамките на Европската Унија.
„Националното обединување значи приклучување кон Европската Унија, сè друго е бајка“, рече Рама.
Тој додаде дека регионалните формули од XIX и XX век немаат место денес и дека приоритет на Тирана и Приштина мора да бидат европската интеграција и меѓународното партнерство.
Изјавата доаѓа во период на заладени односи меѓу Косово и Соединетите Американски Држави и суспендирање на стратешкиот дијалог со Приштина, поради „создавање тензии и нестабилност“.