Синдикалната организација на јавните обвинителства при Синдикатот на УПОЗ ја предупредува јавноста дека јавнообвинителската служба е на работ на целосен колапс поради масовно заминување на кадар, предизвикано од, како што велат, континуирано потценување и невреднување на трудот на службениците.
Според нив, единствениот излез е донесување на новиот Закон за јавнообвинителска служба.
Од Синдикатот велат дека работната група составена од претставници од самите обвинителства во соработка со Министерството за правда изготвила предлог-закон што ги решава клучните проблеми – услови за работа, надоместоци, дежурства и, најважно, систем на плати.
Но, со објавувањето на верзијата на законот на ЕНЕР, тие реагираат дека се игнорирани нивните предлози и повторно се оставаат без суштински решенија.
Синдикатот бара итно да се усвои првичната верзија на законот веднаш по локалните избори и да почне спроведување на сите потребни подзаконски акти.
„Нашата работа бара одговорност и професионалност, но со плати под државниот просек, интересот за оваа служба е во постојан пад“, предупредуваат од Синдикатот, додавајќи дека остануваат отворени за соработка со институциите.