Автобусите на ЈСП Скопје нема да останат без нафта. Ова за Телма го потврдија од компанијата „Пуцко петрол“. Уверуваат дека снабдување со гориво ќе има и покрај тоа што, како што велат, ЈСП им должи 10 милиони евра. Независниот синдикат на возачи, пак, не ја исклучуваат можноста автобусите да останат паркирани.
„Бројот 41 по зимскиот возен ред треба да има по 10 до 12 линии, моментно има 6. Се случува и за бројот 2, 5 за сите линии, 70-ка има само една, а треба да има две. Редуцирани се многу линии“, Африм Муча независен синдикат на возачи на ЈСП.
Граѓаните, пак, мака мачат како да стигнат до своите дестинации. Велат дека со часови чекаат на постојките, а автобусите се редуцирани.
Градот Скопје вчера информираше дека добавувачот на нафта за Јавното сообраќајно претпријатие ја прекинал испораката, а поради тоа ќе поднесат кривична и материјална одговорност, затоа што не го почитувале договорот.
Симона Петровска