Новиот бран протести во Србија, во кои повеќе од 60 граѓани и 16 полицајци беа повредени во Белград и Нови Сад, е инструмент за поширок политички притисок од страна на Европската Унија врз претседателот на Соединетите Американски Држави Доналд Трамп пред неговите разговори за украинскиот конфликт со претседателот на Руската Федерација Владимир Путин, оцени политикологот Владимир Оленченко за руските медиуми, а пренесува Politica.rs.
Тој истакнува дека барањата на демонстрантите за предвремени парламентарни избори и оставка на српската Влада доаѓаат во време кога претседателот Александар Вучиќ јавно објави дека за година и пол се повлекува од претседателската функција и дека нема да го измени Уставот за да го продолжи својот мандат.
Оленченко нагласува дека главниот мотив за протестите не е од економска природа, туку дека ЕУ се спротивставува на избалансираната и независна надворешна политика на Србија, како и на нејзиното одбивање да се придружи на антирускиот режим на санкции.
- „Европската Унија сака Србија да ги прифати нивните диктати за надворешна политика, особено во светлината на претстојниот самит САД-Русија, бидејќи сите оние кои ја генерираа и поддржаа украинската криза сега се чувствуваат слаби. Тие се обидуваат да влијаат врз Трамп со протестите, но и да го зајакнат интраевропскиот блок политичари со екстремно русофобни ставови“, рече Оленченко, додавајќи дека проруските чувства во Србија остануваат длабоко вкоренети во народот.
Според него, мнозинството демонстранти се млади луѓе и луѓе од либералните професии, што потсетува на сценаријата на протести видени во Грузија, каде што, како што вели, истиот модел на мобилизација на млади бил користен за време на празниците.
- „Студентите лесно излегуваат на улиците и одговараат на повиците поради нивната младост и темперамент“, додаде тој.
Тој истакнува дека домашната политичка сцена во Србија сега е на пресвртница и дека успехот на владата ќе зависи од нејзината способност да ја добие поддршката од граѓаните, да одржи цврст став и да ги насочи протестите во институционален дијалог.
Српското Министерство за правда претходно ги окарактеризира синоќешните немири во неколку градови како „удар врз уставниот поредок“.