Американскиот Стејт департмент во својот најнов годишен извештај ги осудува сериозните влошувања на човековите права во клучни европски држави како Германија, Франција и Велика Британија, со фокус на ограничувањата на слободата на изразување.
Извештајот ја отсликува променетата насока на надворешната политика на САД под администрацијата на претседателот Доналд Трамп.
Во делот посветен на Франција, се наведуваат „веродостојни информации за сериозни ограничувања на слободата на изразување“ и се алармира за зголемени случаи на антисемитизам.
За Велика Британија, критики предизвика новиот закон за интернет безбедност, за кој американските власти сметаат дека ја загрозува слободата на говорот под изговор на заштита на децата.
Анонимен висок претставник на американската влада најави отворени дискусии со европските сојузници за она што Вашингтон го дефинира како „цензура или ограничување на одредени политички или религиозни ставови“.
Потпретседателот Џ. Д. Венс веќе во февруари, на Минхенската безбедносна конференција, предупреди на слични трендови во Европа.
Овој годишен извештај, кој традиционално се објавува напролет, годинава беше доработен и изменет за да ги одрази новите приоритети на администрацијата на Трамп, бидејќи дел од документот бил подготвен за време на мандатот на претходниот претседател Џо Бајден.