Во Киев се одржа погребот на 27-годишната украинска новинарка Викторија Рошчина, која почина додека била во руско заробеништво.
Комеморацијата започна со молитва во Соборниот храм „Св. Михаил“ и продолжи со проштална церемонија на плоштадот „Мајдан Незалежности“.
Рошчина работеше за телевизијата „Хромадске“ и беше позната по своите извештаи од судовите, случаите поврзани со Мајдан и антикорупциски истраги. По почетокот на руската инвазија, таа документирaше воени злосторства во окупираните територии.
Двапати беше заробена од руските сили, а вториот пат – во август 2023 – остана во притвор до нејзината смрт.
Нејзиното тело беше вратено во февруари оваа година, без идентификација и во лоша состојба, со знаци на тешка тортура.
Според колегите, Викторија никогаш не била формално обвинета и целиот период била лишена од човекови права – без контакт со надворешниот свет и без здравствена грижа.
Колеги новинари од Украина и странство започнаа заедничка иницијатива – „Проект Викторија“, со цел да ја истражат нејзината смрт и да ги идентификуваат одговорните.
Случајот предизвика силни реакции во украинската јавност, како и меѓу новинарските здруженија во Европа.