Власта и опозицијата не постигнаа договор за измените на Изборниот законик. Наместо компромис, политичките партии вчерашниот ден кој беше и последен од рокот зададен за донесување на овој реформски закон продолжија со меѓусебни обвинувања за одговорноста за застојот.
Премиерот Христијан Мицкоски ја обвини опозицијата за неодговорност и порача дека таа треба да постигне заеднички став, нагласувајќи дека Владата ќе го поддржи законското решение доколку биде договорено меѓу опозициските партии.
Меѓувреме, СДСМ и Левица разменија обвинувања за наводна соработка со власта и за попречување на опозициското обединување околу изборниот модел.
По неуспешните разговори, Мицкоски изјави дека Владата останува фокусирана на реализација на мандатот до 2028 година, но додаде дека е подготвена и за предвремени избори доколку бидат предизвикани.
Од опозицијата, пак, оценија дека единствен излез од актуелната политичка состојба се предвремени парламентарни избори.