И покрај ветувањата на претседателот Доналд Трамп дека ќе стави крај на војната за 24 часа, руските напади врз Украина драстично се зголемија од неговото враќање во Белата куќа во јануари.
Анализа на „BBC Verify“ покажува дека од 20 јануари до 19 јули, Русија лансирала над 27.000 ракети и дронови – повеќе од двојно од бројот во последните шест месеци од мандатот на Џо Бајден.
Во обидите за постигнување прекин на огнот, администрацијата на Трамп двапати привремено ги стопираше испораките на воена помош за Украина, што според критичарите, ѝ дало сигнал на Русија дека може да ја засили офанзивата.
Истовремено, Русија значително го зголеми производството на балистички ракети и дронови, достигнувајќи рекордно ниво на напади, со врв на 9 јули кога беа лансирани 748 проектили.
Украинските градови, особено Киев, се секојдневно мета на напади, што дополнително ја нарушува безбедноста и моралот на граѓаните.
Американскиот сенатор Крис Кунс предупреди дека Москва се чувствува охрабрено од „непоследователноста“ на Трамп, и повика на засилување на американската воена поддршка за Украина, за да се испрати јасна порака дека Западот нема да се повлече.