Врховниот суд на Бразил издаде наредба за куќен притвор за поранешниот претседател Жаир Болсонаро, кој е обвинет дека стоел зад обид за државен удар по загубените претседателски избори во 2022 година.
Одлуката ја донесе судијата Александар де Мораес, кој наведе дека Болсонаро ги прекршил претходно изречените мерки на претпазливост, користејќи ги социјалните мрежи на своите синови за да испрати порака до поддржувачите.
Со новата судска одлука, Болсонаро останува под електронски надзор, му е дозволено да го посетуваат само членови на семејството и адвокати, а од неговиот дом во Рио де Жанеиро се одземени сите мобилни телефони.
Обвинителството го товари поранешниот претседател дека предводел криминална група со цел да ги поништи резултатите од изборите, со наводни планови за ликвидација на актуелниот претседател Луис Инасио Лула да Силва и судијата де Мораес.
Правниот тим на Болсонаро најави жалба, тврдејќи дека неговата порака од протестот во неделата – „Добар ден, Копакабана, добар ден мој Бразил, прегратка за сите, ова е за нашата слобода“ – не може да се смета за кршење на мерките или за кривично дело.
Наредбата предизвика протести од неговите приврзаници, кои организираа автомобилска колона кон неговата затворена заедница во главниот град.
Случајот привлече и меѓународно внимание откако американскиот претседател Доналд Трамп воведе 50% царина на бразилски производи, директно поврзувајќи ја мерката со судската постапка против неговиот политички сојузник.
Судењето продолжува во атмосфера на политички тензии и поделеност во бразилското општество.