Трите најголеми групи во Европскиот парламент, наместо амандман со придавката „модерен“ пред македонскиот јазики и идентитет, се договориле од Извештајот за Македонија, кој треба да се најде пред европратениците идната недела, да се избрише споменувањето на македонски јазик и идентитет. Ова на својот фејсбук профил го објави бугарскиот европратеник, Андреј Ковачев, според кого теми за идентитет и јазик не им е место во извештај за напредокот на земја што аплицира за членство во ЕУ.
„На барање на групата на Европската народна партија, трите најголеми партии во Европскиот парламент – Европските народни партии, социјалдемократите и Обновување (либерали), синоќа се согласија да ги отстранат од нацрт-извештајот за напредокот на Северна Македонија сите референци за „македонски идентитет“ и „македонски јазик“. Очекувам дека овој амандман ќе биде поддржан од мнозинството во ЕП следната недела на пленарна седница“, напиша Ковачев на Фејсбук.
За Ковачев, ваквите теми водат кон неединство и ја отвораат Пандорината кутија, што е потврдено, како што напишал, со постојаните изјави на владеачката партија во Македонија, особено од премиерот Христијан Мицкоски за вековниот македонски идентитет и јазик.
„Нескриената цел на властите во Македонија беше во пресрет на локалните избори, да покажат некаков неверојатен триумф над „источниот сосед“ и со тоа да објаснат зошто би направиле некои козметички измени во нивниот устав и делумно би ги вклучиле Бугарите во него“, напиша Ковачев.
Според него, и покрај невидениот притисок и лобирање, таков преседан не треба да биде дел од извештаите на Европскиот парламент или на која било друга европска институција.
На одлуката на најголемите групи во Европскиот парламент македонскиот јазик и идентитет да бидат тргнати од Извештајот за земјава, реакција стигна и од премиерот Мицкоски, според кого, тоа се прави на талибански начин, обвинувајќи ја за тоа претходната власт.
„На талибански начин се брише и македонскиот идентитет и македонскиот јазик од Извештајот во Европа. Тоа дочекавме како народ во 21. век. Ете тоа го дочекавме. Тоа ни го направија Бујар Османи, Димитар Ковачевски, Бојан Маричиќ и останатите“, изјави Мицкоски.
Според Мицкоски, бришењето на македонскиот јазик и идентите од Извештајот е исто толку лошо како да е додадена придавката „модерен“ пред нив.
„Буквално е подеднакво лошо“, рече Мицкоски.
Но иако ќе се бришат од конечниот Извештај, за Мицкоски позитивно во целата работа, е што Комитетот за надворешни работи на Европскиот парламент го усвои предлог-извештајот за земјава со наведување во него на македонски јазик и идентитет. Тие во компромисните амандмани усвоени од Комитетот минатата недела се споменуваат во четири наврати, во контекст на нивно признавање и почитување.
Тамара Грнчароска