Фридрих Мерц не е избран за канцелар на Германија по првиот круг на гласање во Бундестагот. Тој не ги доби гласовите на сите пратеници на владеачката коалиција, пренесува „Дојче Веле“.
Шокантниот исход на гласање заврши со 310 гласа „за“ од вкупно 630 пратеници, иако демохристијаните и социјалдемократите имаат 328 мандати, а на седницата беа присутни сите пратеници.
Гласањето веројатно ќе се повтори, а друг кандидат освен Мерц нема. Засега нема изгледа дека седницата ќе биде прекината, а пратеничките групи се повлечени на советување.
Иако вчера беше потпишан коалициски договор за влада, се чини дека некои пратеници биле воздржани или не гласале, испраќајќи на тој начин политички сигнал.
Ова е прв кандидат за канцелар во историјата кој се соочува со ваков пораз. Според законот, рокот за второ гласање е 14 дена, кога на кандидатот му треба апсолутно мнозинство. Ако дојде до трет круг на гласање, тогаш ќе биде потребна релативно мнозинство, но тешко замисливо е дека Мерц ќе се впушти во такво нешто.