Владата ќе биде стабилна и доколку Таравари одлучи да си замине од неа, изјави денеска премиерот, во пресрет на средбата со министерот и претседател на Алијанса за Албанците (AA). Ќе разговараат за актуелните случувања, откако собранието на оваа партија одлучи да настапат на изборите со сопствени листи за советници и градоначалници, а подоцна беа исклучени од коалицијата „Вреди“.
Смета дека Таравари има две опции – да остане во оваа Влада на реформи и промени или да се приклучи кон опцијата што повеќе од две децении ја криминализираше државата и ги уништуваше институциите.
- „Што се однесува до моите лични односи со Таравари, во политиката ние комуницираме долго време. Како човек имам позитивно мислење за него, но во политиката образот е нешто што го имаш или го немаш. Тука нема флуидни варијанти. Или држиш до зборот или не држиш до зборот. Јас мислам во неговиот случај најмалку три пати сум покажал и сум го држел зборот. Имало моменти кога можеби имало дилема во рамките на раководството на партијата. Заткулисни игри се провидни игри, лесно се идентификуваат и препознаваат и најчесто ваквите заткулисни игри им се удираат од глава на оние кои ги прават“, истакна Мицкоски.
Таравари, пак, изјави дека ќе ги слушне аргументите на премиерот и потоа партиските органи ќе проценат како да дејствуваат понатаму.
- „Имаме состанок со премиерот Мицкоски, ништо посебно не е. Ние тоа што сме го поминале на Централно претседателство е дека АА ќе има сопствени советнички листи и најверојатно сопствени кандидати за градоначалници во општините каде излегуваме. Ќе го слушнеме премиерот и ќе процениме како продолжуваме натаму“, изјави Таравари
Премиерот вчера изјави дека за него е неприфатливо некој да соработува со ДУИ и да остане во владата. Таравари, пак, денеска и самиот рече дека, во случај на соработка со која било опозициска партија, тие ќе ја напуштат владата.
Доколку се случи тоа, и претседателката Сиљановска смета дека нема ништо да се промени во функционирањето на владата и дека нема да има потреба за предвремени избори заедно со локалните, меѓу другото, затоа што и овие избори успешно го отсликуваат расположението на граѓаните, а понекогаш се и лакмус за тестирање на успешноста на власта.
Далиборка Демјанска Цветановска