Сумата за која пораснала просечната плата покрива само половина од зголемените основни месечни трошоци. Од статистиката може да се види дека минатата година, односно од јануари до декември, синдикалната минимална кошничка се зголемила за близу 6.000 денари, а само трошоците за храна и пијалаци за над 2.000 денари.
Од друга страна пак според последните податоци односно од октомври 2023 до октомври 2024 година, просечната плата скокнала за нешто над 3,000 денари. Па, од ова може да се види дека износот е доволен само за да се покријат зголемените трошоци за храна.
Синдикална минимална кошничка
Јануари 2024 година 57.163 денари
Декември 2024 година 62. 861 денари
Зголемување- 5.698 денари
Храна и пијалаци
Јануари 2024 година 21.007 денари
Декември 2024 година 23.075 денари
Зголемување – 2.068 денари
Просечна плата
Октомври 2023 година 38.843 денари
Октомври 2024 година 42.134 денари
Зголемување – 3.291 денари
Од извештаите на статистика може да се види дека често најголемо поскапување кај храната има кај зеленчукот.
Анализата на ССМ покажува дека во декември лани во однос на ноември, најмногу поскапеле зелката и пиперките, околу 50 отсто. Компирот за над 30 проценти, марулата за 28 отсто.
Од млеко и млечни производи пак најголем скок на цените имало кај одредени видови кашкавал.
Во меѓувреме, ССМ се бори да се качи минималната плата која сега изнесува 22.567 денари и повеќе не е доволна да ги покрие месечните трошоци за храна и пијалаци кој според последните пресметки изнесуваат над 23 илјади денари. Односно толку пари му се потребни во месецот на едно четиричлено семејство само да се прехрани.
Сега, се чека да има нов состанок на претставниците од Владата, работодавачите и синдикатите кој би требало да се одржи до крајот на месецов и да се разговара за ново покачување на минималната плата. Со законското зголемување кое треба да се случи во март нема да се достигне износот од 450 евра кој синдикатите го бараат уште од пред изборите минатата година.
Ирена Чачкова