Бизнисот треба да биде профитабилен, а уметноста не е нужно да биде профитабилна. Елитна култура мора да постои. Ова го кажа за Телма познатиот српски актер Никола Ѓуричко, кој последниве 5 години живее во Лос Анџелес, споредувајќи го западниот третман кон уметничките продукти, како стока што се продава на пазар и односот кон културата во поранешната југословенска заедница.
- Ако е пазарот тој што одредува, мислам можеме да видиме дека тоа нема да оди на добро. Едноставно, мора да постои нешто што е главен колач за културата, јазикот, што знам јас, што се одржува. Особено за тие модерни нешта ,кажа Никола Ѓуричко, актер и музичар.
По ланскoто гостување како стенд ап комичар, Никола Ѓуричко неделава дојде во Скопје, но овој пат за да го промовира албумот, насловен „ По сеќавање“, кој го реализира со неговата група „ Џони Миднајт Трио“, на која за настапот пред нашата публика и се придружи Џоле, на саксофон. На албумот има авторски песни и обработки на нумери од познати групи и пејачи од поранешна Југославија.
- Тогаш ми дојде таа идеја, концептуална, да свириш по сеќавање. Значи да не оди токму како што е во оригинал, туку како ти се сеќаваш на тоа, рече Ѓуричко.
Ѓуричко започна да игра на филм уште пред да дипломира на ФДУ во Белград .Го паметиме по ликовите во филмовите „ До коска“, „ Молњи“, „ Кога ќе пораснам ќе бидам кенгур“, од серијата „ Зона Замфирова“ и од многу други остварувања. Успехот што го постигна во регионот, го продолжи во повеќе американските продукции. Меѓу нив и во франшизата на Нетфликс „ Почудни нешта“.
- Треба да се има среќа, знаеш, да се биде на вистинското место во вистински момент. Ако си добар актер, ти си добар актер, и таму и овде. Добра сцена е добра сцена, автентична игра е автентична игра. Во таа смисла, нема тука некоја дополнителна наука. Единствено што е базенот, ајде така да кажеме, луѓето кои учествуваат во таа игра , се многу повеќе . Но, има многу повеќе работа, рече Ѓуричко.
Актерот најави повторно доаѓање во Македонија со стенд ап во следниов период. Го чека и снимање на нова серија во Белград, а потоа се враќа во Америка, каде работи на вториот албум со „ Џони Миднајт Трио“.
Сотир Трајков