Изобилува со вода, со природна убавина, но и нови куќи во кои се наѕира живот. Но, во Трибичино смеата и џагорот се слушаат само за викенди. Иако во непосредна близина на Струмица, селото првпат нема свое избирачко место. На избирачкиот список се запишани осум гласачи, но за овие избори ќе гласаат во најблиското село, Едрениково.
Маре е една од оние што во селото сега доаѓа само за разонода. Вели, ништо не му недостига, совен луѓе. Порано немале пат, а сега кога е направен, младите не се охрабруваат трајно да се вратат.
Едрениково е соседно село. Не е далеку и гласачите од Трибичино би можеле да стасаат. Но, досега никој не дошол на гласање.
Иселувањето е загрижувачко и во ова населено место. Жителите се главно тутунари, но, незадоволни од економската состојба, бараат чаре во Западна Европа.
Трибичино и Едрениково се села во струмичката Општина Василево. Од градот се оддалечени десетина километри, но, она што го посакуваат за своите потомци, најчесто се наоѓа илјадици километри од нивите родни места.
Сузана Мицева