Исплашени дека со мартовските плати нема да го добијат зголемувањето за 10 отсто што им следува согласно Општиот колективен договор за јавниот сектор, членови на Синдикатот за култура на Македонија денеска дојдоа пред ресорното министерство. Рекоа дека се изложени на манипулации од поединци дека нема да добијат зголемување за 12, туку само за 2 отсто. Нивната реакција следеше откако директорите на установите добиле решение за пресметка на мартовските плати, во чиј диспозитив отсуствува одредбата од Општиот колективен договор, каде на основицата за пресметка следувало зголемувањето од 10 отсто. Министерката за култура ги демантира, со објаснување дека тој процент го има во Општиот колективен договор и кажа како ќе се пресметуваат платите.
„Поединци не убедуваат дека немаме право на 10% од ОКД, бидејќи со покачувањето на минималната плата ќе земеме 12% ,според КД за култура.И тука веќе постојат тие 10% од ОКД за јавен сектор. Тука е замката на реториката затоа што нема да земеме 12% покачување за месец март, туку реално само 2%. Иако според сите закони на правната држава, нам ни следуваат 10% од ОКД и покачувањето од растот на минималната плата, според КД за култура“, изјави Вера Атанасовска, претседателка на СКРМ.
„Во почетокот на самото решение, еве да биде уште појасно, стои дека: Законот за минимална плата, во врска со член 14, став 1 од Општиот колективен договор за јавен сектор. Значи тоа е тоа. Во диспозитивот стои само компонентата која што се менува. Основната бруто плата по следните основи: Минимална бруто плата која е објавена во Службен весник на РСМ, бр. 68/24, согласно закон и ОКД, коефициент на сложеност , согласно КД за култура. И вработениот има право на 0, 5 додаток на основна бруто плата. За секоја година и работен стаж, најмногу 20%“, изјави Бисера Костадиновска-Стојчевска, министерка за култура.
Сотир Трајков