Луис Хамилтон денеска прв пат јавно проговори за идниот трансфер во редовите на Ферари. Седумкратниот светски првак на социјалната мрежа „Екс“ напиша дека со преминот во редовите на италијанскиот тим следната година ќе си го оствари детскиот сон.
Хамилтон по завршувањето на 2024 година ќе се раздели со Мерцедес, тим за кој вози од 2013 година и освои шест од своите седум шампионски титули во Формула 1. Британецот реши предвреме да го прекине договорот со германскиот тим, што го потпиша изминатото лето, а беше со важност за сезоните 2024 и 2025 година. Пилотот истакна дека ова му била најтешката одлука во животот.
„Се чувствувам неверојатно среќен, што со Мерцедес ги остварив работите за кои можев само да сонувам како дете, сега имам нова шанса да остварам уште еден детски сон, а тоа е да возам за Ферари“, напиша Хамилтон.
Поранешниот светски шампион вели дека сега исклучиво се фокусира на претстојната последна сезона во болидот на Мерцедес и се надева дека ќе си замине на високо ниво. Хамилтон нема победено во Ф1 уште од саудиското гран при во 2021 година. Во 2022 година заврши шести во генералниот поредок, а лани беше трет. Изминативе две сезони Ред Бул го презеде приматот на најдоминатниот тим во Формула 1 на чело со Макс Ферстапен. Хамилтон се надева дека ќе успее да ги врати славните години во Маранело, бидејќи Ферари нема освоено шампионска титула од 2007 година, кога славеше Кими Раиконен.
It’s been a crazy few days which have been filled with a whole range of emotions.
But as you all now know, after an incredible 11 years at Mercedes-AMG PETRONAS F1 Team, the time has come for me to start a new chapter in my life and I will be joining Scuderia Ferrari in 2025.
— Lewis Hamilton (@LewisHamilton) February 3, 2024