Белгиската полиција денеска уапси осомничен вооружен маж кој застрела двајца шведски фудбалски навивачи во, како што соопштија властите, „терористички напад“.
Апсењето, во бриселската населба Скарбек, уследи по интензивната потера во главниот град по напаѓачот вооружен со автоматска пушка.
– Полицијата отвори оган за време на апсењето, изјави портпаролот на белгиското обвинителство, Ерик Ван Дујс, без да ја потврди информацијата на телевизијата RTBF дека осомничениот е ранет.
Локалниот градоначалник, Филип Клоз, изјави за францускиот ТВ канал BFMTV дека осомничениот се чини дека е „неутрализиран“. Ова се уште не е потврдено од властите.
Претходно, дел од бриселски медиуми јавија дека осомниочениот е застрелан во градите, но дека е жив и приведен.
Двајца шведски навивачи се убиени синоќа за време на фудбалскиот меч меѓу Белгија и Шведска.
Пукањето се случи на само 5 километри од местото каде се одржуваше натпреварот, на кој присуствуваа 35 илјади навивачи.
Веднаш по убиството на двајцата Швеѓани натпреварот беше прекинат, а навивачите поради нивната безбедност останаа на стадионот по прекинот на квалификациите за Европското првенство.
По инцидентот веднаш беше повикан кризен центар кој го подигна нивото на закана во Брисел и неговиот регион на највисоко и побара од граѓаните да избегнуваат непотребни патувања.
Белгискиот премиер Александар Де Кро сугерираше дека нападот, кој се случи повеќе од еден час пред натпреварот, е поврзан со „тероризам“.
Засега не е јасно дали пукањето е поврзано со меѓународните тензии околу војната меѓу Израел и Хамас.