Новиот менаџер на Челзи, Маурисио Почетино во досегашниот тек од летниот преоден рок го скрати за 14 играчи списокот на фудбалери кои ги има на располагање, но во следниот период се очекува уште најмалку четири да ја сменат средината.
Од продажбата на дел од фудбалерите клубот од Стемфорд бриџ инкасираше сума од 280 милиони евра што е скоро половина од парите кои беа потрошени во последните два преодни рока.
Најголем приход донесе Каи Хаверц кој за 70 милиони евра замина во Арсенал, Мејсон Маунт на Манчестер Јунајтед му е продаден за 64 милиони, а Кристијан Пулишиќ и Рубен Лофтус Чик заедно на клубот му донесоа 36 милиони. Тука се уште Калиду Кулибали и Едуар Менди кои заминаа во Ал Хилал, а од нив двајца Челзи инкасираше 41,5 милиони евра.
Како слободни играчи клубот го напуштија Цезар Азпиликуеа и Н’Голо Канте, а по шест месеци минати на Стемфорд Бриџ, Жоао Феликс се врати во Атлетико Мадрид.
Според медиумите во Англија, Почетино нема да смета на Ромелу Лукаку, Хаким Зиеш, Пјер Емерик Обамејанг и Калум Хадсон Одои кои исто така наскоро ќе ја сменат средината.
Останува до крајот на летниот преоден рок, Почетино да се обиде да доведе уште некое засилување во екипата како би можел да биде конкурентен во трката за највисок пласман во Премиер лигата.
ФОТО: Игор Паневски