Секуларното општество не значи безбожно општество. Црковниот врв ја испрати оваа и други пораки пред насобраните верници и поддржувачи на протестот.
Икони, верски и национални обележја само го дополнија целиот декор во дворот на Соборниот храм. МПЦ гласно се спротивстави на предлог-законските решенија за родова еднаквост и за матична евиденција.
Црквата смета дека со донесување на законите, традиционалното семејство ќе се деградира.
Архиепископот г.г. Стефан порача дека светот го окупира нова идеолошка пропаганда на која и во нашето општество ѝ го гледаме вистинското лице.
Луѓето масовно се одзваа на повикот на црквата и го исполнија дворот на Соборниот храм, но и ги заглавија дел од околните булевари и крстосницата во центарот на градот.
Присутно беше силно полициско обезбедување.
Дел од протестирачите и пред камерата го кажаа ставот – зошто протестираат, против што се и дали се запознаени со законските решенија.
Претходно, Светиот архиерејски Синод упати апел за учество на сенароден собир. Црквата потенцира дека протестот не е насочен против никој, туку исклучиво против содржината на предлог законите.
Но, невладините организации се најдоа прозвани и со денови и се спротивставуваа на црквата и порачаа – МПЦ прави директен упад во секуларноста на државата и не го почитува Уставот.
Петар Догов