Премиерот Димитар Ковачевски не побара оставка од струшкиот градоначалник Рамиз Мерко кој е од неговиот коалиционен партнер ДУИ туку смета дека сите советнички групи треба да се состанат со градоначалникот за да видат што ќе прават во иднина.
Премиерот Ковачевски вели доколку тој се најдел на листата на САД, не само што ќе поднесел оставка, туку тоа ќе го сметал за најголем пораз во неговата лична и професионална кариера, а една од причините е и што претходно се школувал во Америка.
Сепак не побара директна оставка од Мерко туку рече дека треба заедно да седнат и да видат како понатаму ќе функционира државата.
Ковачевски повтори и дека не е јасно како „Американците од растојание од 8.000 километри“ виделе корупција покрај Дрим во кабинетот на Мерко, но не ја виделе надлежните во обвинителството и судството.
На ривалите од ВМРО-ДПМНЕ кои ја критикуваат американската корупциска „диплома“ која ја доби коалицијата на СДСМ и ДУИ, Ковачевски рече дека за нив има предмет поврзан со криминалната изградба на седиштето и рече дека ВМРО-ДПМНЕ да се заинтересира за нивниот предмет и кој „го држи во фиока“.