По протестите пред Министерството за култура, вработените во Филхармонија денеска излегоа на протест пред Владата. Незадоволни од нејзината одлука за привремено сместување на новиот Џез оркестар во зградата на Филхармонијата до неговото правно оформување, вработените од оваа национална установа во знак на протест го свиреа „ Тешкото“ , од композиторот Глигор Смокварски. Од протестот побараа државата да ги заштити како прв и единствен симфониски оркестар во земјава кој постои 79 години, а премиерот Ковачевски да се вклучи во решавање на проблемот.
Бараме итна средба со премиерот за побрзо надминување на проблемот, во кој сме турнати без наша вина. Нашата институција сосема непотребно е ставена во ситуација која треба да биде надмината и апелираме што поскоро да се најде решение. Потсетуваме дека и покрај известувањето на Министерството за култура дека работат интензивно на проблемот со сместување на новоформираниот Џез оркестар во Филхармонија, до моментот не го решија проблемот, вели владимир лазаревски, претседател на синдикалната организација на филхармонија.
Покрај изведбата на „ Тешкото“ , вработените во Филхармонија, протестираа и преку поставени транспаренти на оградата. А, на еден од нив стоеше пораката „ Блокирана сметка не е решение“. Дали Министерството за култура им ја блокирало сметката во знак на одмазда, одговор побаравме во ресорот. Но, од таму демантираа дека сметката на Филхармонија е блокирана. А, од Владата велат дека преку Министерството за култура, од моментот кога е донесена одлуката за формирање на Џез оркестарот се ангажирани за пронаоѓање трајна адреса за новата установа.
Во одлуката јасно е наведено дека новата установа административно и времено е со седиште во објектот на Филхармонија, до потребниот временски рок за нејзино формализирање. Овој временски рок ќе биде децидно запазен, велат од владата.
Протестите на вработените во Филхармонија започнаа од крајот на април, со образложение дека нема просторни, ни технички можности двете установи да работат под ист кров.
Сотир Трајков