Иако завршуваат високо образование, на нашите млади визуелни уметници им недостасуваат теоретски и практични знаења и вештини за работа, особено ако сакаат да аплицираат за меѓународни проекти. Еден од проблемите со кои се соочуваат е недостатокот на знаења поврзани со нивната уметничка презентација.
„Доста знаења што не ги добиваме во нашето формално образование. Од типот, како ние како уметници треба да се претставиме пред публиката, како добро да си го подготвиме нашето портфолио, биографија“, изјави Христина Крстеска, визуелен уметник и истражувач.
„Кога е поконкретна теоријата, многу полесно можеме да се фокусираме на она што треба да го работиме“, вели Крсто Глигоријадис, визуелен уметник, графичар и перформер.
Од Здружението „Факултет за работи што не се учат“, велат дека при контактите со младите уметници, околу организизацијата за доделување на наградата „Денес“, за автори до 35 години, откриле дека им недостасуваат и теоретско – критички анализи за тоа што го работат.
„Контекстуални пристапи кон она што нив ги инспирира. Некаква анализа на нивната практика и начинот на кој самите би можеле да ги артикулираат нивните уметнички позиции“, рече Ивана Васева, историчарка на уметност и куратор.
А, токму оваа тема, младите визуелни уметници денеска ја совладуваа од постариот колега Оливер Мусовиќ, во рамките на едукативната програма „Совршен уметник“, во организација на ФРУ. И тој се судирал со проблеми заради недостатоци во образовниот систем.
„Гледајќи од оваа перспектива, кој би бил најважниот предмет за време на факултетот, веројатно е англискиот јазик.Таа комуникација. Тоа недостасуваше“, рече Оливер Мусовиќ, визуелен уметник.
А, од ФРУ најавуваат дека годинава наградата „Денес“, за прв пат ќе ја доделат не на еден како до сега, туку на тројца млади уметници. Двајца добитници ќе одат на резиденција во странство, а за еден ќе биде организирана самостојна изложба.
Сотир Трајков