Поради вандалски чин, алејата на поетите на кејот на реката Црн Дрим во Струга остана празна. Бистата на поетот Славко Јаневски е откорната од постаментот и украдена, алармираа од меѓународната поетска манифестација „Струшки вечери на поезијата“ (СВП). Случајот бил откриен вчера при проверка, а вандалите се обиделе, но не успеале да ги откорнат и бистите на поетите Ацо Шопов и Сергеј Есенин, кои останале расклатени, кажаа од „ СВП“.
„Најостро го осудуваме вандалскиот чин на кражба на бистата на нашиот истакнат поет Славко Јаневски, како и обидот за кражба на бистите на поетите Ацо Шопов и Сергеј Есенин. Настанот е пријавен во полиција од која очекуваме да ги открие и да ги казни сторителите на овој вандалски чин. Бистите на Ацо Шопов и на Сергеј Есенин превентивно ќе бидат дислоцирани, додека не се осигураат поцврсто и ќе бидат вратени на нивните оригинални локации“, изјави Тодорче Тасевски, директор на „ Струшките вечери на поезијата“.
Ваквите вандалски чинови ќе треба да се оневозможат во иднина со заеднички напори на „СВП“, Општина Струга и МВР, преку засилени мерки на обезбедување на оваа вообичаено фреквентна локација, како и со организирање кампањи за подигнување на јавната свест за значењето и угледот на Струга како светска престолнина на поезијата, велат од оваа поетска манифеставија. И апелираат, сите добронамерни граѓани и почитувачи на поезијата да помогнат со информации во однос на сторителите и пронаоѓањето на бистата.
Осуда за инцидентот стигна и од Општина Струга, од каде велат дека како мултиетничка, мултикултурна и мултирелигиска заедница во која постои кохезија меѓу сите граѓани, нема да дозволат да бидат жртви на вакви провокации.
„Најостро го осудуваме ова дејствие и ќе превземеме мерки за што поскоро решавање на овој проблем и нема да дозволиме да станеме шртви на вакви провокации за уништување на меѓуетничките односи во Струга“, велат од Општина Струга.
ОД МВР потврдија дека случајот бил пријавен кај нив и дека работат на пронаоѓање на сторителите.
Сличен вандалски чин се случи и на 1 октомври во 2021 година, кога бистата на македонскиот поет Анте Поповски беше откроната од постаментот и беше фрлена во Охридското езеро. Потоа беше санирана, зацврстена и вратена на постаментот.
Сотир Трајков