Поранешниот селектор на македонската фудбалска репрезентација Чеде Јаневски спогодбено го раскина договорот со кипарскиот тим АЕЛ. Нашиот стратег седна на клупата на тимот од Лимасол во септември минатата година.
АЕЛ го заврши регуларниот дел од сезоната на осмото место на табелата во кипарскиот шампионат, па продолжи да игра во плејаутот, односно да се бори за опстанок. Моментално тимот е во лоша форма и на последните 9 натпревари во сите конкуренции има само една победа.
Челниците на клубот и Јаневски одлучија да ја прекинат соработката спогодбено. АЕЛ сега е во потрага по третиот тренер сезонава, бидејќи во септември отказ заработи Хорхе Мануел Ребело Фернандеш на чие место дојде токму Јаневски.
Македонецот во својата богата тренерска кариера освен македонската репрезентација ги водеше и Вардар, Црвена Ѕвезда, потоа белгиските Бриж, Мускрон, Васланд Беверен и Мускрон, а во Кипар работеше и во Енозис, Етникос Ахна и Олимпијакос Никозија.
За потсетување во тимот на АЕЛ игра и македонскиот репрезентативец Давор Здравковски, кој е еден од капитените.