Вардар славеше со 29-24 против Татран Прешов во рамки на третиот натпревар во групата Б во СЕХА-лигата. Нашиот шампион е на добар чекор да го освои првото место во групата што беше главната цел на клубот.
„Црвено-црните“ ги анулираа оние четири голови во поразот од првата средба на гостински терен кај Татран Прешов. Освен во почетните први минути, вечерва во „Јане Сандански“ доминираше еден тим. По серија од 6-1, Вардар направи солидна предност со 11-7. Потоа истата се зголемуваше до 15-10 на полувремето. Во вториот дел, домаќинот го засили темпото и дојде до највисоката предност од осум голови, која траеше до самиот финиш. Татран го заврши натпреварот со серија од 0-3 за да го ублажи поразот на конечни 29-24.
Јан Чувара беше најефикасен со пет голови во таборот на Вардар, по четири погодоци имаа Леонардо Дутра Фереира, Гоце Георгиевски и Куни Моралес. Мартин Томовски беше одличен на голот со 12 одбрани.
Вардар последниот натпревар од групната фаза го игра на гостински терен кај Партизан во Белград на 28 февруари.
ФOTO: Игор Паневски