Ракометарите на Вардар в петок во Скопје ќе го одиграат третиот натпревар од новото издание на СЕХА лигата.
Противник на македонскиот шампион е Татран Прешов, кој во првиот дуел во Словачка беше поуспешен и забележа победа од 27:23.
Црвено-црните во второто коло на домашен терен успеаа да го совладаат Партизан, а предводникот на Вардар смета дека екипата е подготвена за нова победа и атак на првото место во групата.
“Пред десет дена одигравме натпревар со истиот ривал. Таму имавме уморни и нови играчи кои не беа доволно уиграни. Отворивме добро, имавме предност, но потоа и пад. Имавме и добри и лоши моменти во нападот и одбраната, но тој беше прв во СЕХА. Репрезентативците добија заслужен одмор, кој навистина им требаше, а потоа имавме неколку тренинзи во комплетен состав. Мислам дека сме подготвени за натпреварот во петок, ќе направиме анализа и ќе гледаме видео денеска, секако дека одиме на победа. Дали ќе биде над четири гола разлика колку што загубивме таму ќе видиме во петок, но ќе направиме се за да се бориме за првото место во групата. Мислам дека овој натпревар ќе биде далеку подобар од оној во Словачка. Имаме повредени играчи, Моралес влече повреда, но тоа е што е. Дополнителен проблем е, но повредите се составен дел од спортот. Во првиот дел од сезоната немавме голем ростер, но сега имаме и новите ракометари од тренинг на тренинг се подобри и подобри”, изјави Недановски на денешната пред конференција.
Мечот в петок се игра во салата на СЦ Јане Сандански и почнува во 18 часот.
ФОТО: Игор Паневски