Италијанските пратенички во иднина ќе можат да дојат на седниците на парламентот и на тој начин ќе можат да ги следат расправите, соопшти денеска собраниската Комисијата за деловник. Пратеничките ќе можат да седат во последните редови во салата или во галеријата, бидејќи досега мораа да одат во просторија за таа намена.
Според Деловникот на долниот дом на италијанскиот парламент, „неовластени лица, под никаков услов, не можат да влезат во салата во која заседават пратениците“. Доењето ќе биде дозволено до првиот роденден на бебето.
„Ова е добра пракса која гарантира уживање на неотуѓиво право во целост и претставува силен знак кој го испраќа најрепрезентативното Собрание на италијанската демократија“, изјави пратеничката Гилда Спортиело од Движењето 5 ѕвезди, кое е предлагач на реформата.
„Сите жени мора да можат да дојат каде сакаат“, додаде таа.
Движењето 5 ѕвезди, популистичка партија кој освои најмногу гласови на парламентарните избори во 2018 година, избра поголем број на млади мајки за парламентот и се залага за усогласување на семејниот живот и деловните обврски.