-Благодарам Тетово, благодарам тетовци, им благодарам на активистите на Беса, ова е голема победа за нашата политичка опција, изборите во Тетово на кои победивме се доказ дека граѓаните ги поддржуваат промените што ги почнавме во Општината- рече лидерот на Движењето Беса и градоначалник на Тетово Биљал Касами кој прогласи победа на изборите за Советот на Општина Тетово и побара вонредни парламентарни избори.
БЕСА и Касами ја прославија победата со зурли тапани и ора додека во партиското седиште во Мала Речица поразот го призна и лидерот на ДУИ Али Ахмети кој соопшти дека БЕСА има повеќе гласови но има и намален одзив на гласачите.
На ланските локални избори имаше над 38% излезност додека на сегашните одзивот е нешто повеќе од 33 % или околу 10.000 гласачи помалку излегле на избирачките места.
Лани победи ДУИ која имаше над 10 илјади гласови, а БЕСА освои 8.367.
ВМРО-ДПМНЕ како и лани е трета по број на гласови и повторно е убедлива пред СДСМ. Влатко Ѓорчев процени дека разликата е дупла и дека покажува опозициско водство и граѓански знак за нови парламентарни избори.
СДСМ го подобри пласманот од лани, но го намали бројот на гласови. Владеачката партија пак победи за градоначалник во Маврово и Ростуше, а нивниот коалиционен партнер од турската партија победи за градоначалник во Центар Жупа (имаше само еден кандидат).
Во Тетово пак е забележан пад на гласовите на Алијанса и Алтернатива (лани беа во иста коалиција и освоија 3.912 гласови ), а сега во водство меѓу двете партии е Алтернатива на Гаши, која пак има сличен резултат како ДПА на Мендух Тачи.
Пад во бројот на гласовите забележа и граѓанската листа на еколошките активисти од Тетово додека Левица засега е на сличен процент како и лани.
ДИК се уште ги пребројува гласовите во Тетово.