Врховниот суд на Русија денеска го прогласи украинскиот полк „Азов“ за терористичка група, пренесуваат западните медиуми повикувајќи се на извори од судот.
Единицата за специјални операции „Азов“, која има екстремно десничарски и ултранационалистички корени, е една од најпознатите украински воени формации кои се борат против Русија во источна Украина.
Русија долго време се повикува на членовите на овој батаљон во своите тврдења дека со Украина управуваат „фашисти“, а Москва милитантите од таа формација ги споредуваше со нацистите од Втората светска војна.
Многу членови на „Азов“ беа заробени по падот на Мариупол, по опсадата што траеше речиси три месеци.
Официјални лица на самопрогласената Народна Република Доњецк, кои го окупираа Мариупол, во мај објавија дека заробените милитанти на „Азов“ може да бидат осудени на смрт, според законите на ДНР.
Русија не спроведува смртна казна, но откако беше исфрлена од Советот на Европа во февруари, поранешниот руски претседател, а денес заменик-претседател на Советот за безбедност, Дмитри Медведев, изјави дека тоа е добра можност да се врати таа казна.