Франција ја заплени суперјахта за која тврди дека е поврзана со рускиот олигарх Игор Сечин, директор на државната руска нафтена компанија Роснефт. Тој е еден од олигарсите на Путин против кого ЕУ неодамна воведе санкции. Информацијата за запленувањето на суперјахтата ја потврди и францускиот министер за финансии Бруно Ле Мер.
„Благодарност до француските цариници кои спроведуваат европски санкции против луѓе блиски до руската влада“, напиша Ле Мер од француското Министерство за финансии и економија на Твитер во соопштението за печатот.
Јахтата е „сопственост на компанија во која Игор Сецин, директор на Роснефт, е идентификуван како најголем акционер“, додаваат од Министерството.
Запленета е јахтата на шефот на руската државна нафтена компанија
Во соопштението се вели дека француските власти вчера ја заплениле суперјахтата Аморе Вело, по потрагата што траела неколку часа. Суперјахта долга 85 метри е запленета на југот на Франција, во бродоградилиштето Ла Сиотат.
Речиси 86 метри долгата луксузна јахта, која на 3 јануари вплови во Ла Сиотат и има базен на мостот што може да се претвори во хелиодром, беше на поправка на бродоградилиштето и требаше да остане таму до 1 април. Нејзината внатрешност беше украсена од еминентниот архитект Алберто Пинто.
„Бродот се подготвуваше брзо да замине“
„Во моментот на контролата бродот се подготвувал за итно поаѓање без да бидат завршени планираните работи“, што е причина за неговото запленување, додаваат од министерството.
Ова е трет брод запленет во Франција како дел од санкциите воведени по руската инвазија на Украина.
Француските власти во саботата го запленија трговскиот брод Baltic Leader на Ла Манш, кој, според Париз, е во сопственост на руската банка ПСБ, а во неделата во пристаништето Марсеј-Фос, рускиот товарен брод Виктор Андриухин.