Офанзивата на Русија врз главниот град на Украина Киев продолжи во раните утрински часови во понеделникот, соопшти украинската војска.
Северно од Киев, руската армија се обидела да изгради понтонски мост за да ја премине реката Ирпин, објави главниот штаб на украинската армија на Фејсбук. Исто така, неуспешно се обиде да го заземе градот Ирпин недалеку од Киев, додаде штабот.
Руската новинска агенција Интерфакс објави дека руските војници напредуваат од јужниот украински град Херсон кон Миколаев.
Во меѓувреме, украинските власти објавија на Телеграм дека проектилот погодил станбена зграда во украинскиот град Чернихив во близина на границата со Белорусија.
Деталите за воениот развој не можеа да бидат независно проверени.
Украинското Министерство за внатрешни работи објави дека загинале 352 цивили, вклучително и 14 деца, откако Русија го започна нападот во раните утрински часови во четвртокот. Според Министерството, до недела навечер се повредени уште 1.684 лица, меѓу кои 116 деца.
Украинската армија соопшти дека загубите на руската армија досега биле околу 4.500 војници, а биле уништени руски хеликоптери, тенкови и други воени возила.
Русија призна дека имало мртви меѓу нејзините војници за време на борбите во Украина, но не наведе бројка.
Мировните преговори меѓу Москва и Киев на границата со Белорусија се закажани за денес.
Се шпекулираше дека Белорусија би можела официјално да се вклучи во војната на страната на Русија, откако украинската новинска агенција УНИАН објави дека на белоруските падобранци им било наредено да летаат во Украина, цитирајќи информации од Андреј Стрижак од белоруската невладина организација Бисол.
Западните сили одговорија со остри санкции, а американскиот претседател Џо Бајден треба денеска телефонски да разговара со сојузниците и партнерите за најновите случувања во кризата.