Градот Скопје останува на ставот од пред два дека , во врска со метежот во сообраќајот, што се случи во текот на попладневните часови ( на 7 декември), на градските сообраќајници и предизвиканиот сообраќаен хаос . Ваков одговор добивме денеска од Град Скопје, на прашањето упатено вчера, во врска со прозивката од МВР дека службите на Град Скопје не биле на висина на задачата зашто под нивни ингеренции е Центарот за управување и контрола на сообраќајот, кој го контролира протокот на возила на крстосниците.
– Јасни се надлежностите на Градот и на Центарот за управување и контрола на сообраќајот, кој служи исклучиво за мониторинг на сообраќајот во градот. Градот Скопје ниту има надлежност за регулирање на сообраќај, ниту пак има надлежност во регулирање при сообраќајни несреќи. Сообраќајниот колапс е доказ дека граѓаните се жртва секогаш кога институциите, а во случајот МВР не си ја заврши својата работа, велат од Град Скопје.
Град Скопје интензивно ќе работи на реализација на проектите за решавање на сообраќајниот хаос, меѓу кои се нови сообраќајни решенија, инфраструктурни решенија и решенија за алтернативен превоз. Реорганизација на јавниот превоз, набавка на нови еколошки автобуси и зголемување на фреквентноста и бројот на линиите, како и креирање непрекинат систем на безбедни велосипедски патеки и стимулирање на користење на алтернативен превоз се дел од проектите кои ќе овозможат поголема проточност по градските соообраќајници, но ќе влијаат и на заштитата на животната средина и здравјето на граѓаните, велат од Град Скопје