Ќе има прегласување на едно избирачко место во Дебар. Управниот суд ја прифати жалбата на Алијанса за Албанците и Алтернатива за резултатите од гласањето по листите за кандидатите за градоначалник и советници на Општина Дебар, за избирачко место број 0543.
Како што информираат оттаму, оспореното Решението на ДИК се поништува и се одлучува да се уважи приговорот на Коалиција Алијанса за Албанците и Алтернатива од Тетово за повреда на постапката за гласање и сумирање на резултати предвидена со Изборниот законик. И во ДИК немаше едногласност за одлуката, бидејќи таа не беше поддржана од членот Кренар Лога. Според Лога, записникот од Избирачкиот одбор е невалиден бидејќи не бил потпишан од мнозинството членови на ИО. Исто така, беше наведено дека претседателот на Одборот на избирачкото место на денот на гласање бил разрешен од Општинската Изборна Комисија, но продолжил да ја врши функцијата.