Бојан Јовановски од домашен притвор е однесен во затворот Идризово. Ова за Телма го потврдува директорот на затворот Јовица Стојановиќ кој вели дека првите триесет денови Боки 13 ќе ги помине во приемното одделение, а се уште важи и протоколот за заштита од Ковид 19 со кој ќе треба да помине денови и во изолација.
По ова ќе биде префрлен во полуотворено одделение за да ја доиздржи 9 годишната затворска казна од која веќе 2 години Јовановски ги помина во ефективен или домашен притвор. Сепак ќе се следи и неговата здравствена состојба бидејќи токму поради постоперативни компликации тој од затвор беше пратен во куќен притвор. Попладнево судија за извршување санкции го испратил упатниот акт за издржување на правосилната затворска казна.
Предметот е испратен и во Гевгелискиот суд, кој сега е надлежен и за екс обвинителката Катица Јанева која е во домашен притвор во семејната куќа во Гевгелија. Претходно пак нејзината адвокатка најави дека ќе бара да се одложи извршувањето на затворската казна од 7 години, поради здравствени проблеми. Адвокатката Ирена Фрчковска најави и вонреден правен лек до Врховниот суд, а и жалба до Стразбур. Инаку двајцата се осудени за случајот Рекет. Јанева за злоупотреба на службената положба како специјален јавен обвинител, а Боки 13 за рекет и перење пари.