Министерството за здравство соопшти дека во текот на утрешниот ден, тим од клиниката за педијатрија ќе бидат упатени во болницата во Гевгелија, каде изминатиот месец лекарска помош побарале 50 деца и бебиња со симптоми на респираторни инфекции.
Д-р Аспазија Софијанова, д-р Весна Мицевска и д-р Валентина Јовановска Огненовиќ заминуваат како поддршка на педијатрите и евентуални дополнителни испитувања во делот на специфична дијагностика.
Како што информираат од здравство, во моментов во болницата во Гевгелија, хоспитализирани се само две бебиња, поради возраста, додека 20-тина деца се на терапија, но не се и задржани во болница.
Се тврди дека ОБ Гевгелија досега ги има преземено сите здравствени протоколи за третман на младите пациенти, но поради неспецифичноста на самите инфекции кои се појавиле во топлиот период, а карактеристични се за есен и зима, потребни се дополнителни анализи.
