За жителите на тетовско-гостиварскиот регион процесот на имунизација против ковид 19 ќе се одвива во спортската сала на Медицинското училиште во Тетово.
Од утре салата ќе биде регионален вакцинален пункт, а други за сега не се планирани.
Жителите на тетовското село Лешок се задоволни од организацијата на процесот на вакцинација, иако сметаат дека би требало да има пункт и во руралните средини.
Повозрасните лица за да стигнат до вакциналниот пункт зависат од своите најблиски кои треба да ги однесат до Тетово.
Во салата на Медицинското училиште сѐ е подготвено за утрешниот почеток на масовната имунизација.Таму дневно е планирано да се вакцинираат по 1 000 лица.
Пристигнати се 4 000 вакцини од компанијата Синофарм, а се очекуваат континуирано и нови пратки.
Тетовската градоначалничка, Теута Арифи, апелираше граѓаните да го почитуваат закажаниот термин за вакцинација.
Инаку во просториите на Здравствениот дом во Тетово досега се вакцинирани 1 600 лица. Никој од нив не пријавил несакани ефекти по примањето на вакцината.
Данијела Билбилоска