Сите опции се отворени, па и можноста дел од пратениците од коалицијата предводена од ВМРО-ДПМНЕ, да преминат во другиот табор, прогнозираат аналитичарите, коментирајќи ги претстојните преговори за влада. Очекуваат на политичката сцена да остане тивко, како што е деновиве. Професорот Никола Дујовски не гледа некои посебни недоразбирања меѓу партиите, оттаму и не очекува поразениот да не прифаќа формирање на влада како во 2016-та. Убеден е дека следи многу помирен период и прифаќање на резултатите такви какви што ќе бидат. Смета дека претседателот Пендаровски нема да го следи примерот на неговиот претходник и дека ќе му даде мандат за формирање на влада на тој што ќе приложи гаранции дека има обезбедено мнозинство од 61 пратеник.
Во денешното интервју за А1ОН, Заев не открива детали за можното коалицирање, велејќи дека ќе разговара со сите партии што се подготвени да го прифатат европскиот и демократски концепт. За Мицкоски вели дека е аутсајдер кој „кукавички се сокрил во белата палата„. Не коментира ниту за ДУИ, велејќи само дека мандатот го добива првопласираната, а не третопласираната партија. Најави дека, по враќањето од одмор во август ќе го заокружи изборниот процес. Собранието ќе биде ставено во функција, ќе биде формирана влада, а наесен ќе бидат целосно активни и сите други институции.
Синоќа и Извршниот комитет на ВМРО-ДПМНЕ го овласти Мицкоски да се обиде да состави влада. Ахмети засега останува на ставот Зибери да биде премиер, но не ги затвора сите врати. Единствено од Алијанса за Албанците се децидни дека е невозможно тие и ДУИ да се најдат во иста влада. Таквата коалиција ја нарекоа „хибрид што нема да функционира„.
Далиборка Демјанска Цветановска