Дел од децата повредени во автобуската несреќа во Бугарија денеска се транспортирани во српските клиники. Со пет возила на бугарската итна медицинска помош седум полесно повредени лица се префрлени на српската граница каде ги чекаа седум возила на итната помош од Ниш од каде се транспортирани на клиниките во Белград.
– Сите пациенти се во стабилна здравствена состојба, од овој момент ќе ги следиме нивните витални параметри. Имавме исклучителна соработка со полицијата, граничарите и медицинската служба од Бугарија, така што се помина без никакви проблеми – изјави Душан Миленковиќ специјалист по ургентна медицина од нишкиот Ургентен центар.
Две деца кои беа со потешки повреди утрово со две возила на Брза помош од болницата во Стара Загора се пренесени во „Пирогов“ и таму остануваат на понатамошно лечење. Утрово бугарскиот министер за здравство Асен Меџидиев рече дека над нив ќе бидат извршени и хируршки интервенции.
Во болницата во Стара Загора под лекарски надзор пак остануваат две возрасни лица со абдоминални повреди.
Во автобуската несреќа која се случи нешто по 20 часот на автопатот Тракија се превезувале вкупно 49 патници, од кои 38 биле деца, а 11 возрасни. Надлежните во Бугарија велат дека најверојатно човечка грешка е причината за несреќата со српскиот автобус на автопатот Тракија.
Александар Петрески