Со гала концерт на четирите славни италијански тенори Алесандро Де Акриса,Федерико Сера, Џовани Мариа Палмиа и Уго Такрвини, вечерва на Античкиот театар во 21 часот започнува 62 издание на фестивалот Охридско лето. На програмата ќе бидат дела од 18 композитори, а со оркестарот на Националната опера и балет ќе диригира Лоренцо Бицари. Пред почетокот на концертот уметничка порака ќе испрати нашиот баритон и композитор Горан Начевски, а обраќања ќе имаат министерката за култура и претседателот на државата Пендаровски, кој како покровител на Охридско лето ќе го прогласи фестивалот за отворен.
До 20 август кога завршува Охридско лето на програмата се предвидени 33 музички и 9 театарски изведби, со учество на 1000 домашни и странски уметници од 24 земји. Традиционално, почетокот на фестивалот ќе биде означен со палење на фестивалскиот оган и со интонирање на химната, чиј автор е композиторот Томислав Зоргафски.