Ахмети би седнал на маса со опозицискиот лидер, за да дебатираат за клучните прашања, особено за проблемот со Бугарија. Подготвен е за дебата и компромиси но, се противи на најавената блокада на законодавниот дом од страна на опозицијата.
Блокадите не се категорија за унапредување на демократијата, таа се унапредува со дебати и компромиси. Мислам дека самите средби немаат ништо лошо во себе, но не со условувања и уценување… Сепак, за одредени, важни теми што имаат за цел унапредување на домашните политика, може да има вакви средби. Добро е да има консултации за тоа како ќе напредува спорот со Бугарија, спорот што нас не` блокира кон отворање на преговори со ЕУ и секако дека нам во земјава ни треба етнички и политички консензус.. Во ваква ситуација може да има дебата, средби, но не и блокада. Самите блокади се пречка за натамошно напредување, изјави претседателот на ДУИ.
И премиерот би седнал да разговара со опозицискиот лидер, но само со проширен дневен ред.
Уцена, со одбројување, два дена, пет дена, со единствена точка на дневен ред предвремени избори, таква средба нема да има. Може да седнеме, да разговараме за проблемите на граѓаните. Избори ќе има во 2024 година, изјави Ковачевски.
Од ВМРО-ДПМНЕ денеска поднесоа два закони во Собранието, иако се заканија дека, доколку Ковачевски не прифати средба со Мицкоски, за да разговараат за предвремени избори, ќе го блокираат законодавниот дом. Доколку останат на ставот, ќе бидат заглавени околу 70 закони, меѓу кои има и нивни предлози.
Од владејачките партии најавија дека ќе ги искористат сите деловнички механизми за да обезбедат функционалност на Собранието, но најголем проблем ќе бидат законите кои мора да се донесат со двотретинско мнозинство.
Далиборка Дамјанска Цветановска