Стоп за војната, не верувајте на пропагандата, овде ве лажат, ова е содржината на транспарентот со кој уренчката на руската телевизија Канал 1, Марина Овсијаникова упадна во програмата додека нејзината колешка Екатерина Андреева ги читаше вестите. По инцидентот програмата беше прекината. Овсијаникова однесена во притвор, предходно веќе си обезбедила адвокат, кој за Си Ен Ен вели дека во моментот не знае каде се наоѓа таа, иако ги проверил сите полициски станици низ Москва. Пред протестот, кој се случи во живо, таа сними видео во кое вели дека се срами да работи за, како што ја нарече, пропагандата на Кремљ.
Инаку на медиумите во Русија им е забрането да ја нарекуваат инвазијата во Украина – „војна“. Наместо тоа, официјално се зборува за „воена специјална операција“. Ја прикажуваат Украина како агресор, на чело со влада опишана како неонацистичка.
Неодамна во Русија беше усвоен закон со кој се придведи 15 годишни затворски казни за она што власта го смета за „лажни информации“ за армијата.
Неколку од преостанатите независни медиуми престанаа да емитуваат или објавуваат по притисок од властите, вклучително и радио станицата „Ехото на Москва“ и ТВ Дожд – онлајн ТВ канал. Новинарите во весникот Новаја Газета, се обидуваат да известуваат за ситуацијата без да ги прекршат новите закони на цензура. Во страв од можи казни, голем дел светски канали како Би-Би-Си и Радио Слободна Европа веќе ги повлекоа своите информативни сервиси од територијата на Русија.
Билјана Ставрова