Претседателот на Турција Реџеп Таип Ердоган и премиерот на Албанија Еди Рама одржаа заедничка прес-конференција по тет-а-тет средбата меѓу делегациите и церемонијата на потпишување на седум договори помеѓу Турција и Албанија.
Ердоган истакна дека Турција и Албанија имаат длабоки историски врски и дека се едни покрај други и во добро и во лошо.
„Вистински пријател е оној кој трча напомош и без повик и токму водени од оваа идеја дојдовме да помогнеме веднаш по разорниот земјотрес што неодамна ја погоди Албанија“, рече Ердоган.
Коментирајќи ги добрите односи кои ги има Турција со земјите од Балканот, Ердоган рече дека Турција не е примена во Европската Унија, но дека е угледна и силна членка на НАТО.
Тој нагласи дека Турција придава големо значење на зачувувањето на мирот и стабилноста на Балканот.
„Како што секогаш го правевме својот дел од работата за мирот и просперитетот на Балканот, остануваме една од земјите гаранти на мирот и спокојството во иднина“, рече Ердоган.
Ердоган е во официјална посета на Албанија каде што присуствуваше на церемонијата во албанскиот град Лач за предавање на 522 станбени единици вредни 42 милиони евра, наменети за семејствата кои го загубија покривот над главата во земјотресот во 2019 година.
Вчера турскиот претседател свечено ја отвори џамијата „Етем-бег“ која беше реставрирана од Турската агенција за меѓународна соработка и координација (ТИКА), а ќе има обраќање и пред пратениците во албанскиот Парламент.