Формула 1 годинава ќе се врати во Малезија, која ќе биде домаќин на трката за Големата награда на Бахреин. Натпреварувачкиот викенд ќе се одржи од 2 до 4 октомври на патеката „Сепанг“, меѓу трките во Азербејџан и Сингапур.
Трката првично требаше да се вози во Бахреин, но беше откажана поради војната и нестабилната безбедносна состојба на Блискиот Исток. Формула 1 и ФИА проценија дека не постојат услови за безбедно одржување на настанот на патеката „Шакир“, па во договор со владите на Бахреин и Малезија беше пронајдена заменска локација.
Иако ќе се вози на „Сепанг“, официјалниот назив на настанот ќе биде Големата награда на Бахреин во Малезија. Бахреин ќе остане организатор и финансиски покровител на трката, додека Малезија ќе ја обезбеди патеката и потребната инфраструктура. Конечната потврда треба да ја даде Светскиот совет за моторспорт.
„Сепанг“ беше дел од календарот на Формула 1 од 1999 до 2017 година. Последен победник на оваа патека беше Макс Ферстапен.
Со ова решение, Формула 1 ја зачува трката што во спротивно ќе отпаднеше од календарот, а останатиот дел од сезоната засега останува непроменет.