Реконструкцијата на владата е театар за народ и замена на фотелји, е оценка на опозициската СДСМ во пресрет на 112 собраниска седница која се очекува да започне денеска на која се планирани разрешувања на досегашни членови на владата и именување на нови.
„Мицкоски нема никаков резултат зад себе, па денеска ќе прави нов политички театар. Стариот кабинет со нов распоред, односно козметичка промена на фотелји во истата криминална структура. Некои министри се преместуваат, доаѓаат неколку нови имиња, но клучните ресори и клучниот центар на моќ останува во истите раце на Христијан Мицкоски. Кога економијата стагнира, кога граѓаните живеат сè потешко, кога цените растат, кога европскиот пат е блокиран, а Владата нема одговори за ниту еден суштински проблем, Мицкоски се обидува со реконструкција да го пренасочи вниманието од сопствениот неуспех. Со оваа реконструкција не се менуваат политиките, не се поправаат грешките и не се презема одговорност. Се менуваат само фотелјите, додека истите луѓе продолжуваат да управуваат со државата. Реконструкцијата сама по себе е признание дека Владата не испорача резултати. Македонија не може да оди напред со стара Влада во нова амбалажа“, се наведува во соопштението на СДСМ.