Голем пожар попладнево избувна во магацински простории на Јужен булевар во скопската населба Кисела Вода, при што поради интервенцијата на терен, во дел од населбата се исклучени и струјата и водоснабдувањето.
Густ црн чад беше видлив од повеќе делови на Скопје, а на местото интервенираат екипи на Бригадата за противпожарна заштита кои работат на локализирање и гаснење на пожарот.
Директорот на Дирекцијата за заштита и спасување, Стојанче Ангелов, информира дека се запалил магацински или друг објект на Јужен булевар. Тој посочи дека од внатрешноста на објектот се слушале пукотници, кои најверојатно биле предизвикани од електричната инсталација.
Надлежните служби засега не соопштуваат информации за евентуално повредени лица, ниту за причините за избувнувањето на пожарот. Повеќе детали се очекуваат по завршувањето на интервенцијата
