СДСМ преку соопштение остро реагираше на денешната изјава на премиерот Христијан Мицкоски дека по завршувањето на мандатот нема да се кандидира за претседател на државата и дека планира да се врати на факултет.
Од опозициската партија велат дека Мицкоски не може едноставно да ја напушти политиката без да понесе одговорност за, како што тврдат, состојбите во кои ја довел државата.
„Откако ќе ја ограби Македонија, ќе ја изолира од европскиот пат, ќе го постави своето судство и обвинителство и ќе ја доведе државата до економски и институционален колапс, сака мирно да си замине и да се врати во академска кариера? Нема да биде така“, се наведува во соопштението.
Од СДСМ оценуваат дека Македонија е во најтешка изолација во последните децении, дека е блокирана европската перспектива и дека институциите се, како што велат, ставени во функција на организирана криминална група.
Партијата порачува дека ќе дојде време кога, според нив, ќе има независно обвинителство и ќе се бара одговорност од сите кои ја воделе државата.
„Мицкоски може да сонува за враќање на факултет. Реалноста е дека пред тоа ќе мора да одговара за она што го направи со Македонија и со македонскиот народ“, наведуваат од СДСМ, додавајќи ја и пораката: „Освен ако не мисли на онаа: ‘Затворите се нашите универзитети!’“.